હું અને મારી સ્વીટી..

 

       હું અને મારી સ્વીટી અહીંયા  હું એટલે હું પોતે. સેજલ શાહ મારુ નામ, અને સ્વીટી એટલે મારી મારી બેસ્ટી મારી જિંદગી.. આટલું વાંચી ને તમને થતું હશે કે સ્વીટી મતલબ કોઈ છોકરી હશે.. પણ નહીં.. તમને કહી દવ કે સ્વીટી મારી બિલાડીનું નામ છે. 

          જ્યારથી એ મારી જિંદગીમાં આવી ને મારી તો જિંદગી જ બદલી ગઈ.. સાચું કહું તો હું એને બહુ જ પ્રેમ કરું છું.. મને યાદ છે આજ થી એક વર્ષ પહેલા સ્વીટી મને મળી અને ત્યાર થી જાણે મારી જિંદગી એની સાથે જોડાઈ ગઈ..

           એક વર્ષ પહેલાં રાત્રે સાતેક વાગ્યાની આસપાસનો સમય હતો ને હું સ્ફુટી લઈને મારી ફ્રેન્ડ સપનાને ત્યાં જતી હતી.. અચાનક જ રસ્તામાં એક લોહી લુહાણ હાલતમાં એક બિલાડીનું બચ્ચું આવી ગયું.. 

          મેં સ્ફુટી ઉભી રાખી ત્યારે મને ખબર પડી કે એની પાછળ કેટલાક કુતરાઓ પડ્યા છે.. જો હું એ વખતે ત્યાં ના હોત ને તો એ લોકો એ બિલાડીના બચ્ચાને ફાડી ખાત..

          મેં નીચેથી એક પથ્થર ઉઠાવી એ કુતરાઓ પર ફેંક્યો ને એ લોકો ડરના માર્યા ત્યાંથી ભાગી ગયા.. 

         એ બિલાડીના બચ્ચાની એ લોહી લુહાણ હાલત હું જોઈ ના શકી અને હું એને તરત જ નજીકના એક હેલ્થ સેન્ટરમાં લઈ ગઈ.. એ પછી હું એને મારા જ ઘરે લઈ આવી.. એની થોડી કેર કરી ને એકાદ વીકમાં તો એ પણ એકદમ નોર્મલ થઈ ગઈ.. એ વખતે મેં એનું નામ પણ રાખી લીધેલું.. સ્વીટી.. એ હતી જ એટલી સ્વીટ..

       સપના પછીની મારી એકમાત્ર ફ્રેન્ડ એટલે સ્વીટી.. 

        મને હજુએ યાદ છે કે એ દિવસોમાં ફેસબુક,ઇન્સ્ટાગ્રામ, ટ્વીટર બધે જ હું ને મારી સ્વીટી માનો છવાઈ ગયેલા.. સ્વીટી સાથેની મારી સેલ્ફી પર ઢગલો લાઇક્સ આવતી.. અમુક લોકોએ તો મારી સ્વીટીને ખરીદવાની પણ વાત કરેલી.. પણ પૈસામાં વેંચાય જાય એ સબંધ થોડો કહેવાય.. સ્વીટી મારી જાન હતી..

          આમ તો અમારી યારી જ એટલી ન્યારી હતી કે હું સ્વીટી વગર ક્યાંય જતી જ નહીં.. પછી એ કોલેજ હોય કે કાફે, મલ્ટીપ્લેક્ષ હોય કે મોલ સ્વીટી મારી સાથે હોય જ.. આમ પણ કહ્યું ને કે એ મારી જાન હતી એના વિના મને જરાય ગમતું નહીં.. 

          

           સ્વીટી ના આવવાથી જાણે મારી બેસ્વાદ જિંદગીમાં મીઠાસ ભળી ગઈ.. મારી સ્વીટીને લઈને માનો હું ખુશીઓ ના સાતમા આસમાને પોહચી હતી.. જ્યાં બસ ખુશી જ ખુશી હતી.. 

           આમ તો સ્વીટી ના આવવાથી મારી જિંદગી પુરી થઈ ગઈ..મારે હવે કોઈની જરૂર નોહતી.. હું ખુશ હતી મારી સ્વીટી સાથે.. 

                                  * * *

            પછી અચાનક જ મારી ખુશીમાં ગ્રહણ બનીને એ આવ્યો. રોહન મહેતા આ કહાનીનો વિલન, મારી જિંદગીનો વિલન.. એ લેખક હતો અને એની એક બુક થ્રુ અમે સોસીયલ મીડિયા પર મળ્યા..

         મેં એની એક ઇબુક  ''સાસ્વત પ્રેમ'' વાંચી અને એ મને બહુ જ પસંદ આવી.. એ જ પળે મેં લેખકનો કોન્ટેકટ કર્યો..

        થોડો શ્યામ અને શરમાળ અમે મળ્યા ત્યારે પણ હું જ બધુ બોલતી હતી એ.. એ તો માત્ર ખામોશી થી મારી સામે જોઈ રહેલો.. લાગણીશીલ, એકદમ સિમ્પલ પર્સનાલિટીવાળો એ શરૂઆતમાં તો મને બહુ જ સારો લાગ્યો પણ એની સાથે રહ્યા પછી મને ખબર પડી કે એ માણસ મનનો કેટલો કાળો છે..     

           એને એકવાર મળ્યા પછી મને એની એ સિમ્પલ પર્સનાલિટી બહુ જ ગમી.. ખરેખર મને એવા વ્યક્તિની તલાશ હતી જે મને સમજે.. આમ તો એની સાથેની બે ત્રણ મુલાકાતોમાં હું એને ચાહવા પણ લાગી કદાચ એ પણ મને પ્રેમ કરતો હશે ? પણ એનેય મારી જેમ આંખો કહેતી ને હોઠ ખામોશ રહેતા.. 

          એના શરમાળ સ્વભાવને કારણે મને ખાતરી તો હતી જ કે એ સામેથી ક્યારેય પ્રપોઝ નહીં કરે.. એટલે એકદિવસ મેં જ મારા દિલની વાત એને કહી દીધી..

           એણે પણ મારા પ્રેમને અપનાવી લીધો. બહુ પાછળથી મને ખબર પડી કે એ પોતે અનાથ છે અને છેલ્લા પાંચ વર્ષથી એના ફ્રેન્ડના ઘરે પી.જી. તરીકે રહે છે. પછી શું હું જ એને મારા ઘરે લઈ આવી આમ પણ મારું ઘર બહુ જ મોટું હતું.. એ આરામથી રહી શકે એમ હતો.. હા શરૂઆતમાં એણે થોડી આનાકાની કરેલી પણ પાછળથી સાથે આવવા માની ગયો.. 

        એ પછી શું અમે મનથી નજીક હતા ને હવે શરીરથી પણ એકબીજાની સાવ નજીક આવી ગયા.. 

         મને બહુ પાછળથી જાણ થઈ કે એને જાનવરો પસંદ ખાસ નોહતા.. હું સ્વીટીને લઈને ફરતી એ પણ એને ગમતું નહીં..એકવાર તો એણે મને એ પણ કહી દીધું કે તું આ બિલાડીને વેંચી નાખ.. પણ કેવી રીતે.. સ્વીટી વિના હું કેવી રીતે રહી શકું.. આ બાબતમાં અમારી વચ્ચે ઝઘડો થયો ને.. એણે મારી સામે એક જ વિકલ્પ મુક્યો.. 

        ''કા તો હું અથવા તો આ બિલાડી.. તું જ નક્કી કર.. જો તું આને સાથે રાખવા માંગે છે તો મને ભૂલી જાજે..''

        હું એને છોડી શકું પણ સ્વીટી ને નહીં.. એનો મતલબ એ નથી કે હું એને પ્રેમ નોહતી કરતી.. હું એને ખરેખર ચાહતી હતી.. 

          પણ સ્વીટી માટે મારે એને છોડવો પડ્યો.. 

          એ જ દિવસે એ મને છોડીને શાયદ હમેશા માટે જતો રહ્યો..

                                 * * *

        રોહન ના ગયા પછી હું સાવ એકલી થઈ ગઈ.. એવું તો નહીં કહું.. કારણ કે મારી સ્વીટી મારી સાથે હતી.. અને એ જ્યાં સુધી મારી સાથે છે.. કદાચ મારે કોઈની જરૂર નથી.. હા પણ રોહન ને હું હજુ આજે પણ ભૂલી નોહતી શકી.. એની યાદમાં આજે પણ આંખો રડતી હતી.. થતું કાશ રોહન પાછો આવી જાય..

          એક દિવસ બધું જ ભૂલી રોહન પાછો આવી ગયો.. અને આવતા વેંત જ એણે એના એની ભૂલ બદલ માફી માંગી.. એણે મારી સામે એના કાન પકડતા કહ્યું

         ''સેજલ, મને માફ કરી દે.. પ્લીઝ... પછી થોડું રોકાઈ આગળ કહ્યું..  જે થયું એ ભૂલી જા.. હવે આપણે સાથે રહીશું.. તું હું અને આપણી સ્વીટી..''

         હું ખુશ થઈ બધું જ ભૂલી એને વળગી પડી.. 

          એ પછી એ હું અને અમારી સ્વીટી અમે એક સાથે એક જ છત નીચે રહેવા લાગ્યા.. 

          હું ખુશ હતી કે રોહન પાછો મારી લાઈફમાં આવી ગયો.. અને હવે એને સ્વીટીથી પણ કોઈ પ્રોબ્લેમ નથી.. એ ખુદ દિવસભર સ્વીટીને લઈને ફરતો, એની કેર કરતો..

         એક દિવસ મેં એને કોઈ અજાણી વ્યક્તિ સાથે ફોન પર વાતો કરતા સાંભળ્યો.

          એ ધીમે ધીમે હસીને કોઈ સાથે વાતો કરતો હતો.. પહેલા તો મેં એની વાતો પર વધારે ધ્યાન ના આપ્યું.. પણ એણે જ્યારે પ્રોપર્ટીની વાત કરી ને ત્યારે એને ખબર ના પડે એમ બારી પાછળ છુપાઈને મેં એની આખી વાત કાન ખોલીને સાંભળી..

           એ કહેતો હતો,

        ''બસ એક વખત એની પાસે પેપર સાઈન કરવી લવ એટલે એ પચીસ કરોડની આ પ્રોપર્ટીઝ આપણી..''

        એના મોં એ આ પ્રોપર્ટીઝવાળી વાત સાંભળતા જ મને યાદ આવ્યું.. 

         પપ્પાના ગયા પછી એમના ખાસ દોસ્ત મહેતા અંકલે મને એમની વસિયત વિશે કહ્યું હતું.. 

         ''બેટા, રાજેશ ના ગયા પછી એની પચીસેક કરોડની પ્રોપર્ટીઝ પર હવે તારો અધિકાર છે..''

           ''યાર સાઈન અત્યારે ના કરાવાય... બે દિવસ પછી એનો બર્થડે છે.. એ બર્થડે માં જ હું એની સાઈન લઈ લઈશ..''

          હવે એને બધી જ ખબર પડી.. રોહન મહેતા.. એટલે પપ્પાના દોસ્ત નારાયણ મહેતાનો દીકરો.. 

           મહેતા અંકલ મારી સાથે આવું શા માટે કરે.. હું તો એમની દીકરી જેવી છું..  

           

         એ રાત્રે રોહનની સચ્ચાઈ મારી સામે આવી ગઈ.. કદાચ આ જ કારણ હતું કે એ ફરી વખત મારી જિંદગીમાં આવ્યો.. 

         એની સચ્ચાઈ મારી સામે આવતા જ સૌથી પહેલા તો જઈને મેં ગુસ્સામાં એના ગાલ પર એક ચડાવી દીધી.. 

           એ મારી સામે જોઈ લુચ્ચું હસ્યો..

           ''રોહન, તે પૈસા માટે મારી સાથે પ્રેમનો ઢોંગ કર્યો.. તે પ્રેમના નામે મને છેતરી..'' 

            ''સારું થયું કે તને મારા વિશે પહેલા જ બધી ખબર પડી ગઈ.. હવે મજા રમવામાં આવશે, ખરેખર મજા આવશે..''

          હું પણ હસી, ''ખરેખર મજા આવશે.. હું હમણાં જ પોલીસને તારા વિરુદ્ધ ફરિયાદ કરું છું..''

          આ વખતે એ મોટેથી હસ્યો અને એનું અટ્ટહાસ્ય આખા રૂમમાં ગુંજવા લાગ્યું.. 

           પછી ક્રોધથી એની આંખો લાલ થઈને એણે મારા પાછળથી મારા વાળ પકડી મને પોતાની નજીક ખેંચી..

          ''કાન ખોલીને સાંભળી લે.. તારે પ્રોપર્ટીઝ ના ડોક્યુમેન્ટ્સ પર સાઈન કરવી જ પડશે નહિતર..''

           ''નહિતર.. નહિતર શુ કરી લઈશ..''

           આ વખતે એ પહેલાં કરતા વધારે મોટેથી હસ્યો.. 

           ''તું જ નક્કી કરી લે તને તારા પૈસા વ્હાલા છે કે પછી તારી ઈજ્જત..''

           હું સવલભરી નજરે એની સામે જોઈ રહી..

           ''ગઈકાલ રાત્રે તું નશામાં હતી ને.. અને નશામાં તે.. એ રાતનો મારી પાસે એક વીડિયો છે.. જે હું વાઇરલ કરી દઈશ..''

           એણે મારી ઈજ્જત ને પોતાનું હથિયાર બનાવ્યું.. પણ હું કમજોર પડું એવી નોહતી.. મેં એને સાફ શબ્દોમાં કહી દીધું 

           ''તારે જે કરવું હોય એ કરી લેજે પણ હું સાઈન નહીં જ કરું..''

           આ વખતે એણે મને મજબૂર કરવા બીજું હથિયાર ઉપાડ્યું.. 

           ''લાગે છે કે તને પેલી બિલાડીથી ખાસ લગાવ નથી રહ્યો..''

           સ્વીટી.., અચાનક મને સ્વીટીની યાદ આવી.. બે કલાક પહેલાં સ્વીટી રોહન સાથે હતી અને અત્યારે..

           હું એની ઉપર મોટેથી ચિલ્લાઈ..

           ''સ્વીટી ક્યાં છે..? શુ કર્યું તે એની સાથે..?''

           ''એ મારી પાસે છે અને અત્યારે તો સેફ છે પણ જો તે..''

          ''હું સાઈન કરવા તૈયાર છું પણ પ્લીઝ.. મારી સ્વીટીને કઈ ના કરતો.. ''

             

           એક બિલાડી માટે હું કરોડો રૂપિયાની સંપત્તિ છોડવા તૈયાર થઈ ગઈ..

            એજ રાત્રે મેં એને પ્રોપર્ટીઝ ના ડોક્યુમેન્ટ્સ પર સાઈન કરી આપી.. એણે મને મારી સ્વીટી પાછી આપી દીધી ને એને લઈને હું એ ઘરમાંથી ચૂપચાપ નીકળી ગઈ.. 

           કરોડો રૂપિયાની સંપત્તિ એકમાત્ર વારસદાર હું આજે એક ઝૂંપડપટીમાં રહું છું.. મારી સ્વીટી સાથે.. 

            

                                 સમાપ્ત